Afrika Dzonga yi ni nhlayo leyi tlakukeke swinene ya ku pfumaleka ka mintirho eka vantshwa emisaveni hinkwayo leswi endlaka vutomi byi tika ngopfu eka vantshwa, ngopfu-ngopfu vantshwa va le tindhawini ta le makaya laha ku pfulekeriwa ka tindlela ku nga ha va loku pimiweke ngopfu. Kambe Mopani Farmers Association (MFA) yi tshemba swinene leswaku eku pfumalekeni ka ku pfulekeriwa ka tindlela ta mintirho ya kahle ni muholo, vantshwa va nga byalela mindyangu ya vona swakudya leswi nga ni rihanyo naswona va nga xavisa leswi nga sala eka leswi va swi byaleke loko va kota ku kuma ndhawu, mati, timbewu ni vuleteri lebyi faneleke.

Hikwalaho ka sweswo, MFA yi tirhisane na National Youth Development Agency (NYDA), ku khoma nhlangano wa masiko ya ntlhanu hi Januwari 2023 ya vantshwa lava humelelaka ka ku ti sungulela mabindzu eholweni ya MFA le Giyani e Limpopo. Vuleteri lebyi byi endleriwe ku pfuna vantshwa lava lavaka ku ti sungulela tipulani ta vona ni ku nyika nkongomiso eka ku pfulekeriwa ka tindlela ta ku nyikiwa mali hi NYDA. NYDA i ndzawulo leyi nga simekiwa hi mfumo ku pfuna ku tlhantlha swiphiqo leswi vantshwa va langutanaka na swona. Vantshwa van’wana va kote ku sungula ntirhisano na nseketelo wa NYDA.

“Leswi u swi endlaka namuntlha, swi ta komba leswaku vumundzuku bya wena byi ta va njhani,” ku hlamusela Alice Tivani loyi a humaka eka MFA. MFA yi tirha hi matimba ku thola vantshwa va le makaya lava lavaka ku sungula mabindzu ya vona ni ku va nyiketa vuleteri hi timhaka ta wurhangeli bya le makaya, ndlela ya ku tsarisela ku kuma ndhawu ni ku tsarisela xitifiketi xa Ku Pfumeleriwa Ku Kuma Ndhawu (Permission to Occupy (PTO)). Etintsindzeni ta Vurimi Bya Fambiselo Ra Swivumbiwa ta le MFA, vuleteri bya vurimi bya fambiselo ra swivumbiwa byi nyikeriwa eka vantshwa hi vatirhi lava vativaka vurimi bya fambiselo ra swivumbiwa lava rhangelaka vuleteri lebyi tirhaka.

NYDA yi nyikela ku pfulekeriwa ka tindlela ka ku hambanahambana eka vantshwa ni ku pfulekeriwa ka tindlela ka ku nyikiwa mali. Ku kuma voxokoxoko lebyi engetelekeke, hi kombela u nghena eka ndhawu ya Interneti ya NYDA www.nyda.gov.za kumbe u tlhava riqingho eka nomboro ya vona ya mahala hi nkarhi wa ntirho eka 087 158 6345 / 5738.